தக்காளி ரசம்

இந்த தக்காளி ரசம் முன்பு எங்க வீட்டு சின்ன விருந்துக்கு, எங்க பக்கத்து வீட்டு சமையல்காரம்மா செய்ஞ்சாங்க….மறுபடியும் செய்முறை கேட்டு போட்டு இருக்கேன். [ இது விருந்துக்கான தக்காளி ரசம். வீட்ல நமக்கும் முயற்சி செய்யலாம். நல்லாத்தான் இருக்கும். யாரு நம்மள கேட்பா? ]

முன்பே ரெடி செய்து வைக்க வேண்டியவை

• மிளகு, சீரகம் தனித்தனியாக வறுத்து ஒன்றாக சேர்த்து வறலாக அரைத்து வைத்துக்கொள்ளவும்,
• தேவையான அளவு புளியை ஊற வைத்து, பிழிந்து, சாறு எடுத்து வைத்துக்கொள்ளவும்,

தக்காளி பிசறல்

• தேவையான தக்காளி எடுத்துக்கோங்க,
• அதில் மஞ்சள் தூள் சேர்த்து பிசறி விடுங்க,
• இப்போது கொத்துமல்லி தழை கொஞ்சம் காம்புடன் பிய்த்து அதில் தூவி விடுங்க,
• அரை டீஸ்பூன் அளவுக்கு வெல்லம் எடுத்து தூவுங்க,
• கறிவேப்பிலை சிறிது எடுத்து அதையும் சேருங்க,
• தேவைப்படும் அளவுக்கு [ இந்த கலவைக்கு மட்டுமான ] கல் உப்பு சேருங்க,
• அரைத்து வைத்த மிளகுசீரக பொடியைத் தேவைப்படும் அளவு தூவுங்க,
• இரண்டாக நறுக்கி வைத்த பச்சைமிளகாய்களை [ காரத்திற்கு தகுந்தாற்போல ] போடவும்,

       இப்போது எல்லாவற்றையும் சேர்த்து நன்றாக பிசறிவிடுங்க. பிசறி விட்டதை எடுத்து தனியே தனியே வைத்திடுங்க.

ரசம் கூட்டி வைத்தல்

• வாணலியில் நல்லெண்ணெய் ஊற்றி காய்ந்ததும்…. [ அடுப்பு தீயை மிக மிதமாகவே மாற்றி விடுங்க ]
• சிறிது கடுகு போடுங்க,
• சீரகம் போடுங்க,
• கறிவேப்பிலை போடுங்க,
• தோலுடனோ அல்லது தோல் இல்லாமலோ தேவைப்படும் அளவு இடித்து வைத்த பூண்டை தூவி விடுங்க,
• சில வரமிளகாய்களைப் போடுங்க,
• [ஏற்கனவே தக்காளி பிசறளில் கொஞ்சம் கல் உப்பு சேர்த்தோம் ] அதனால் இதற்கு வேண்டிய தூள் உப்பை மட்டும் சேருங்க,
• பச்சைவாசனை போகும் வரை அல்லது கோல்டன் பிரவுன் கலர் வரும் வரை வதக்குங்க,

• கலர் வந்ததும், வதக்கிக்கொண்டே, ஏற்கனவே பிசறி வைத்த தக்காளி பிசறலை எடுத்து, அப்படியே அடுப்பில் வதக்கிக்கொண்டு இருப்பதில் போடுங்க,
• உடனேயே அத்துடன் ரெடி செய்து வைத்திருந்த புளித்தண்ணீரைக் கொட்டுங்க,
• வதக்குவதை விடாமல் தேவைப்படும் தண்ணீரைக் கலந்துவிடுங்க,
• இத்துடன் மீண்டும் சிறிது கொத்துமல்லி தழையை கிள்ளி போடுங்க,

• இப்போது கொதிக்கட்டும். [ மிக மிதமான தீயை ஓரளவுக்கு பெரியதாக மாற்றி விடுங்க ]
• தளதள என்று மொத்தமாக கொதிக்க விடாமல், லேசாக மட்டும் கொதிக்க விட வேண்டும், 
• நுரை வரத்துவங்கும். பிறகு தக்காளி பிசறல்கள் எல்லாம் நடுவுக்கு வந்து, ஓரத்தில் ரசம் கொத்திக்கத்துவங்கும். அந்த நேரத்தில் ரசத்தை இறக்கிவிடுங்க.

இருங்க! இன்னும் இருக்குங்க…

• வேறு ஒரு தாளிக்கும் வாணலியில் தேவைப்படும் நெய்யை [ அதிக நெய் வேண்டாம் ] ஊற்றி, காயவிடுங்க,
• காய்ந்ததும், கறிவேப்பிலைக் கொத்தை உருவி போடுங்க, வதக்குங்க,
• இதில் பெருங்காயத் தூளைத் தூவி, லேசாக வதக்கிவிடுங்க,
• அடுப்பை அனைத்து விட்டு, இதனை எடுத்து, இறக்கி வைத்திருந்த தக்காளி ரசத்தில் ஊற்றுங்க,

அவ்வளவு தான் தக்காளி ரசம் ரெடி.

===============================================

செய்முறை 2

இது நான் செய்யும் வீட்டு ரசம். இந்த ரசத்தையும் செய்து பாருங்க. அருமையாக இருக்கும்.

கரைத்தல்

• கரைத்தல்
• புளி சிறு எலுமிச்சை அளவு
• பழுத்த தக்காளி பழம் 2
• கொத்தமல்லி தழை காம்பு இல்லாமல் சிறிது
• கறிவேப்பிலை
• மஞ்சள் தூள்
• உப்பு

• எலுமிச்சை அளவு புளியை ஊற வைத்து, ஊறியதும் நன்கு கரைத்து கசடுகளை எடுத்துவிட்டு புளித்தண்ணீரை மட்டும் எடுத்துக்கொள்ளுங்க,
• நன்கு பழுத்ததாக தக்காளிப் பழம் 2 எடுத்து, அந்த புளித்தண்ணீரில் போட்டு, கைகளினால் நன்கு பிசறிவிடுங்க,

    தக்காளி தோல்கள் மற்றும் சக்கைகள் தேவைப்படாது, வெளியே எடுத்துவிட்டு, புளி மற்றும் தக்காளி தண்ணீர் மட்டும் இருக்கட்டும்.

• அந்த தண்ணீரில் கறிவேப்பிலை மற்றும் காம்புகள் இல்லாத கொத்தமல்லி தழை சிறிது எடுத்து நன்கு பிய்த்து போடுங்க,
• உப்பு மற்றும் மஞ்சள் தூள் சேருங்க,
• நன்கு கையால் கலந்து விடுங்க.

அரைத்தல்

• மிளகு 1 ஸ்பூன்
• சீரகம் 1 1/2 ஸ்பூன்
• கொத்தமல்லி விதை 1 ஸ்பூன்
• வர மிளகாய் [ காரத்திற்கு ஏற்ப ]
• கறிவேப்பிலை சிறிது மட்டும்
• பூண்டு தேவையான எண்ணிக்கை
  • [ பெரியது என்றால் 6 or 7, சிறியது என்றால் 10 or 11 ]

• முதலில் பூண்டைத் தவிர அனைத்தும் போட்டு, கொரகொரப்பாக அரைத்து விடுங்க,
• பின்னர் பூண்டு பற்களைப் போட்டு ஒரு சுற்று சுற்றி எடுத்திடுங்க.

தக்காளி ரசம்

• கடுகு
• வெந்தையம்
• வர மிளகாய்
• கறிவேப்பிலை
• பெருங்காயத்தூள்
• கொத்தமல்லி தழை

• அடுப்பை மிதமான தீயில் வைத்து அதில் ஒரு வாணலியை வைத்து, அதில் தேவையான எண்ணெய்யை ஊற்றி சூடாக்குங்க,
• எண்ணெய் காய்ந்ததும் அதில் சிறிது கடுகு, 2 மட்டும் வெந்தயம், வீரமிளகாய் 2, கறிவேப்பிலை தேவைக்கு போடுங்க,
• உடனேயே அரைத்து வைத்ததையும் போட்டு, 2 பிரட்டு பிரட்டி விடுங்க,
• இப்போது கரைத்து வைத்ததை சேர்த்து, பெருங்காயத்தூள் தூவி, கலந்து விடுங்க,
• கொதிக்க விடுங்க . [இல்லை இல்லை கொதிக்க விட வேண்டாம். நன்றாக நுரைத்து கொதிக்க ஆரம்பிக்கும் போது அடுப்பில் இருந்து இறக்கி விடுங்க ]
• ரசத்தை இறக்குவதற்கு முன்னால் கொத்தமல்லி தழையை மேலே தூவி விடுங்க.

     இந்த தக்காளி ரசத்தில் சிறிதளவு துவரம் பருப்பு தண்ணீரை சேர்த்து கொதிக்க வைத்தால் அது எளிமையான பருப்பு ரசமாகி விடும். [ சாம்பார் வைக்கும் போது பருப்பு தண்ணீர் எடுப்பது எளிது தானே ]

அவ்வளவு தான் தக்காளி ரசம் ரெடி.

Tags,

thakkaali rasam, rasam, தக்காளி ரசம், ரசம், காய்ச்சல் ரசம்,

.