உப்பலான சாப்ட் பூரி

மென்மையான பூரிகளும், அதற்கு பொருத்தமான உருளைக்கிழங்கு மசாலாவும்… வாய்விட்டு சொல்லிப் பாருங்க. உடனே சாப்பிடணும் போல எண்ணம் எழுகிறதா?

‘எப்படி செய்தாலும் பூரி அப்பளம் போல உடைந்து தான் வருகிறது.’ ‘பூரி ஏன் உப்பவே இல்ல’ இவை சில நேரங்களில் காதில் விழும் சலிப்புகள் தான். இதை விட ‘பூரி வட்டமாவே வரல பா…’ ம் கூட சொல்லுவார்கள். என்ன செய்தால் பூரி மென்மையாக, சுவையாக பிய்த்து சாப்பிட எளிதாக இருக்கும்? – என்று பார்க்கலாமா?

பூரிக்கு தேவையானவை

• கோதுமை 3 கப்
• மைதா 1 கப்
• தேவையான உப்பு
• சக்கரை 1/2 டீஸ்பூன்
• சமையல் எண்ணெய் 1 டேபிள் ஸ்பூன். [ தேவைக்கு ஏற்ப பயன்படுத்தவேண்டும் ]
• தண்ணீர் அல்லது சிறிது சூடு ஏற்றிய வெந்நீர் 2 க்கு 1 என்ற கணக்கில்

செய்முறை

• ஒரு வாய் அகன்ற பாத்திரத்தில் கோதுமை மாவையும், மைதா மாவையும் சலித்து ஒன்றாக கலந்து வையுங்க,
• அதில் தேவைக்கு தகுந்தாற் போல உப்பு தூவிக்கொள்ளவும்,
• சிறிது மட்டும் சக்கரைப் பொடியைத் தூவவும், [ இது பூரிக்கு சுவையை அதிகரிக்கும் ]
• மீண்டும் மாவை அழுத்தம் இல்லாமல் பிசறி விடுங்க,
• இப்போது அதில் சிறிது சிறிதாக சமையல் எண்ணெயை ஊற்றி பிசறி விடுங்க, [ இது மாவு பிசறி விடும் போது மாவு கையில் ஒட்டாமல் இருக்க, அல்லது பூரி பொரிக்கும் போது அதிக எண்ணெய் குடிக்காமல் இருக்க, அல்லது பூரி பார்க்க வறலாக இல்லாமல், சிறிது நெகிழ்வாக பளபளப்பாக தெரிய, என்று காரணம் எதற்காக வேண்டுமானாலும் இருக்கலாம் ]
• இப்போது தண்ணீர் ஊற்றி பிசைய வேண்டும்.

தண்ணீர் அல்லது கை பொறுக்கும் மட்டும் உள்ள வெந்நீர் எடுத்து வைத்தோம் அல்லவா? அதை மொத்தமும் அப்படியே ஊற்றி விடக் கூடாது. சிறிது தண்ணீர் ஊற்றி உடனே ஒரு சில பிரட்டு, பிறகு மீண்டும் சிறிது தண்ணீர் மற்றும் சில பிரட்டு, என்று தண்ணீரை ஊற்றி கிளறிக்கொண்டே இருக்க, இருக்க மாவு நம் கையில் உருள ஆரம்பிக்கும். இந்த நேரத்தில் தண்ணீர் ஊற்றுவதை நிறுத்திவிடவேண்டும். [ ஒன்றுக்கு அரை என்ற கணக்கு என்றாலும் இந்த அளவு, மாவை பொறுத்து மாறுபடும். பொதுவாக சிறிதே சிறிது அதிகம் வேண்டுமானால் ஆகலாம்.]

மாவை அழுத்தமாக பிசையாமல் அதே நேரம் குளோப் ஜாமூனுக்கு பிசைவது போல மென்மையாகவும் இல்லாமல், சிறிது அழுத்தம் கொடுத்து உருட்டி உருட்டி பிசைய வேண்டும்.அவ்வப்போது கையில் சிறிது சமையல் எண்ணெயை எடுத்து தடவிக்கொண்டு பிசையலாம், [ மாவு கையில் ஒட்டாமல் இருக்கும்.] இப்போது உருட்டி வைத்த பூரி மாவு பளபளப்பாகவும், ஒரு விறல் வைத்து அழுத்தினால் லேசாக உள்ளே அமுங்கி விடும் பதத்திலும் இருக்கும். இதனை துணி கொண்டு மூடி வைத்துவிடுங்க.

சிறிது நேரம் கழித்து, [ ரொம்ப நேரம் வேண்டாம். உப்பி வராது.] மூடி வைத்த மாவை தேய்க்க ஆரம்பிக்கலாம்.

• சிறிது மாவை பெரிய தட்டில் கொட்டி, பக்கத்தில் வைத்திருங்கள்,
• மூடி வைத்த மாவை சிறு சிறு உருண்டைகளாக ஒரு பாத்திரத்தில் பிரித்து உருட்டி வையுங்கள்,
• ஒவ்வொரு உருண்டையாக எடுத்து, இரண்டு பக்கமும் மாவு லேசாக ஒட்டி இருப்பது போல, பக்கத்தில் உள்ள மாவில் வைத்து அழுத்தி எடுங்கள்,
• மாவில் வைத்து அழுத்தியதும், தட்டையாக மாறிய பூரி மாவுருண்டையை தேய்க்க ஆரம்பியுங்கள்,
• வட்டமாக வந்ததும், எடுத்து தனித்தனியாக தட்டிலோ அல்லது சுத்தமான பருத்தித் துணியிலோ வைத்திடுங்கள்,

       வட்டமாக வர : இது மிகவும் எளியது தான். முனை கூறாக உள்ள ஒரு சிறிய டிபன் பாக்ஸ் மூடியை எடுத்து, தட்டையாக இட்டு வைத்த பூரி மாவில் வைத்து ஒரு அழுத்து அழுத்தி, வெளியே நீட்டிக் கொண்டிருக்கும் மாவை எடுத்துவிட்டால், மூடியின் உள்ளே வட்ட வடிவ பூரி மாவு இருக்கும். 

         இட்டு வைத்த பூரி மாவை வெகு நேரம் காற்றில் வைத்த பின் எண்ணெயில் போடக்கூடாது. பூரி உப்பி மென்மையாக வராது. எனவே பூரி மாவை வட்டமாக இட்டவுடன் விரைவாக அவற்றை எண்ணெயில் போட்டு எடுக்க வேண்டும்.

• அடுப்பில் ஒரு வாணலியை வைத்து, எண்ணெயை ஊற்றிக் காய வையுங்க, [ மிதமான தீயில் பூரி சுடவேண்டாம். அதற்கென்று திகுதிகு என்றும் எரியவிட வேண்டாம். ]
• நன்கு காய்ந்ததும், ஒரு பூரி மாவை எடுத்து எண்ணெயில் போடுங்க,
• போட்டதும், தட்டையாக பிடி நீளமாக உள்ள கண் கரண்டியை வைத்து, மாவை மிக லேசாக எண்ணெயில் அழுத்தி விடுங்க,
• அழுத்த அழுத்த மாவு வெந்து, உப்பி மிதக்க ஆரம்பிக்கும்,
• உடனே அதைத் திருப்பிப் போட்டு 10 செகண்டில் எடுத்துவிடுங்க,

 [ பூரி அதிக நேரம் எண்ணெயில்  இருக்க வேண்டாம். இதனால் பூரி உள்ளே வெந்திருக்குமா? என்ற சந்தேகமும் வேண்டாம். சில நொடிகளிலேயே பூரி கண்டிப்பாக வெந்து விடும். ]

• முதலில் ஒரு 6 அல்லது 7 பூரி இட்டு எடுத்துவைத்ததை, எண்ணெயில் போட்டு எடுத்து விட்டு பிறகு அடுப்பு தீயைக் குறைத்து விட்டு, மீண்டும் 6 ,7 பூரிகளை இட்டு துணியில் வையுங்கள்.
• பின்னர் மீண்டும் தீயின் அளவை அதிகரித்து, எண்ணெய் நன்கு காய்ந்ததும், இட்டு வைத்த பூரி மாவைப் போட்டு பூரி சுடுங்கள்.
• அடுத்து சில உருண்டைகளை இட்டு வையுங்க, அவற்றை எண்ணெயில் போட்டு பொறியுங்க, இதன் படியே மாறி மாறி அடுத்தடுத்து எல்லா உருண்டைகளையும் இட்டு, பொரித்தெடுங்க.

அவ்வளவு தான், சாப்பிட மென்மையான, வட்டமான பூரி ரெடி. செய்ய செய்ய செய்யும் முறையும் தெளிவு படும், விரைவாக செய்யவும் வந்துவிடும்.

Tags,

puri suduvathu eppadi?, poori masala, poori seivathu eppadi, poori masala seivathu eppadi, uppalana poori, puri masala, பூரி மசாலா, பூரி செய்வது எப்படி, பூரி மசாலா செய்வது எப்படி, உப்பலான பூரி, பூரி மசாலா,

.