அதிக வெள்ளைப்படுதல் – பிரச்சனையும் தீர்வும்

              வெள்ளைப்படுதல் என்பது சாதாரணமாக மாதவிடாய் காலங்களுக்கு முன்பும், பின்பும் ஒரு சில நாட்கள் வந்து நின்றுவிடும். இது இயல்பு. ஆனால் அந்த நேரங்களில் இல்லாமல் மாதம் முழுவதும் அதாவது 5 நாட்களுக்கு மேல் அல்லது 10 நாட்களோ 15 நாட்களோ இல்லை மாதம் முழுவதுமோ ஒருவருக்கு சிறிது சிறிதாக வந்து கொண்டே இருக்கிறது என்று இருந்தால், அது கவனிக்கவேண்டிய விஷயம் ஆகிறது.

                 பொதுவாக ‘வெள்ளைப்படுதல்’ என்பது நமது இனப்பெருக்க உறுப்புப் பாதையை சுத்தமாகவும், ஈரப்பதமாகவும் வைத்திருக்க உடல் உருவாக்கும் ஒருவிதமான ஹார்மோன் திரவம் தான். இது உடலுக்குள்ளேயே நடக்கும் ஹார்மோன் மாற்றம் ஆகும். சாதாரண நிகழ்வுகளாக நடக்கும் பொழுது ‘வெள்ளைப்படுதல்’ என்பது நமது உடலுக்கு தேவையான ஒன்றாக இருக்கும். ஆனால் இந்த ஹார்மோன் மாற்றங்கள் அளவுக்கு அதிகமாக மாறும்போது, வெள்ளைப்படுதலும் அதிகமாக பட ஆரம்பிக்கிறது. அதாவது மாதவிடாய் சுழற்சியின் போதும், பருவ வயதின் போதும் ஏற்படும் சாதாரண ஹார்மோன் மாற்றங்களாக இல்லாமல் அந்த நேரங்களில் மாற்றங்களின் அளவு அதிகரிக்கும் பொழுது, உடல் சூடு ஏற ஆரம்பிக்கும். இதனால் வெள்ளைப்படுதலும் அதிகரிக்கரித்து, பெண்களுக்கு, முக்கியமாக பருவம் எய்திய சிறு பெண் குழந்தைகளுக்கு தீராத ஒரு பிரச்சனையாக ஆகிறது.

இந்த ‘வெள்ளைப்படுதல்’ யாருக்கெல்லாம் அதிகமாக வெளியேறும்?, என்ன மாதிரியான வழிகளில் ‘வெள்ளைப்படுதல்’ வெளிப்படும், அதனுடைய அடுத்த நிலை என்ன? அதற்கு நம் உடல் வெளிப்படுத்தும் அடையாளங்கள் மற்றும் அதனை சரி செய்யும் முறைகள் ஆகியவற்றைப் பற்றி கொஞ்சம் தெரிந்து கொள்ளலாமா? 

யாருக்கெல்லாம் வெள்ளைப்படுதல் அதிகமாக வரும்

நாம் நமக்கு நாமே கடைபிடிக்க வேண்டிய சில சுகாதாரமான முறைகளை சரிவர கடைபிடிக்காமல் அலட்சியமாக இருப்பது, நம்முடைய பெண்ணுறுப்பில் சில பாக்டீரியா தோற்று மற்றும் நோய் தொற்றுகளை உருவாக்கும். [ அது பெரும்பாலான பெண்களுக்கு இருப்பது தான். நம்மை சுற்றி உள்ளவர்களைக் கவனிக்கும் அளவுக்கு நாம் நம்மை கவனிப்பது இல்லை தானே? ]

பெண்ணுறுப்பு சுத்தம் 

• நமது பெண்ணுறுப்பின் சுத்தத்தில், பாதுகாப்பில் கவனம் செலுத்தாமல் அதனை சுத்தமில்லாமல் வைத்திருத்தல் – அதாவது நாம் ஒவ்வொரு முறை பாத்ரூம் செல்லும் பொழுதும், சரியாக சுத்தப்படுத்தாமல் அப்படியே விட்டு விடுதல்.

• பெண்ணுறுப்பை மறைக்க பயன்படுத்தும் உள்ளாடை துணியின் சுத்தத்தில் கவனம் செலுத்தாமல், முழுதாக ஒரு நாள் முழுவதும் அதனை மாற்றாமல் போட்டிருத்தல். நாம் அணியும் உள்ளாடையை அவ்வப்போது எப்படி இருக்கிறது, என்று பார்ப்பதில் கவனம் செலுத்தாமல் விடுதல். ஏனென்றால் வெள்ளைப்படுதல் காரணமாக நாள்பட்ட உள்ளாடையின் அந்த அடி பகுதி ஒருவித வடவடப்பாக ஆவதுடன், ஓட்டை விழும் நிலைக்கு கூட போய்விடும். அவ்வாறு இருந்தால் உடல் சூடு அதிகமாக இருந்து வெள்ளைப்படுதல் அதிகமாக வெளியேறுகிறது, என்று அர்த்தம். அதனால் நாம் பயன்படுத்தும்உள்ளாடை எவ்வாறு இருக்கிறது என்பதிலும் நாம் கவனம் செலுத்த வேண்டும். ஒரு நாளைக்கு இரண்டு முறையாவது உள்ளாடை மாற்றுவது, அதுவும் சுத்தமான உள்ளாடையாக வைத்திருப்பதும் மிக நல்லது.

உணவு முறை 

• ஏற்கனவே உடல் சூடு அதிகமாக இருப்பவர்கள், அதை தணிப்பதற்கு உண்டான எதிலும் கவனம் செலுத்தாமல் மேலும் உடல் சூடு அதிகப்படும்படி காரக்குழம்பு, புளிக்குழம்பு என்று உடல் சூட்டை அதிகரிக்கும் படியான உணவுப் பொருட்களை அதிகம் உட்கொள்பவர்களுக்கு வரும். உடல் சூடு குறித்து எந்த விதமான கவனமும் இல்லாமல் ‘அது இயல்பான விஷயம்’ என்ற எண்ணத்தில், நம்மையும் நம் சூழ்நிலையும் கவனத்தில் கொள்ளாமல் எப்பொழுதுமே உடல் சூடு அதிகம் இருக்கும் படியே வைத்திருப்பவர்களுக்கும் இந்த இந்த ‘வெள்ளைப்படுதல்’ அதிகப்படும்.
• உடலுக்கு தேவையான போதிய சத்து இல்லாத உணவினை அடிக்கடி எடுத்துக் கொள்பவர்கள் அதாவது சத்தான உணவுகளில் கவனம் செலுத்தாமல் வேலை முறை காரணமாகவோ சூழ்நிலை காரணமாகவோ பசிக்கு மட்டும் உணவு எடுத்துக் கொள்ள வேண்டும் என்ற எண்ணமுள்ள உள்ளவர்களுக்கு ஹார்மோன் மாற்றம் அதிகப்பட்டு ‘வெள்ளைப்படுதல்’ அதிகப்படும்.    

• அதிக ஆசைக்கு தெருவோர கடைகளில் ஃபாஸ்ட் ஃபுட் கடைகளில் அடிக்கடி வாங்கி உண்பவர்களுக்கு வரும்.
• சத்து குறைபாடு உள்ள பருவம் எய்திய குழந்தைகளுக்கும் இருக்கும்.

பிற காரணங்கள்

• இது போக ‘கர்ப்பமாக இருக்கும் பெண்‘களுக்கும் அந்த நேரத்தில் அவர்கள் எடுத்துக் கொள்ளும் சில மருந்துகளின் காரணமாக ‘வெள்ளைப்படுதல்’ வரும்.
• சூழ்நிலை காரணமாக யூரினை அடக்கி வைப்பவர்களுக்கு வரும்.
• தண்ணீர் அதிகம் எடுத்துக் கொள்ளாமல், உடல் வெப்பத்தை சமநிலைப்படுத்தப்படாமல் விட்டாலும் ‘வெள்ளைப்படுதல்’ வரும்.
• அவசரம் காரணமாக ஈரமான உள்ளாடை பயன்படுத்துபவர்களுக்கும் வரும்.
• மலச்சிக்கல் அதிகம் இருக்கும் பெண்களுக்கு இது வரும்.
• அதிக கோபம், அழுத்தம் இருக்கும் பெண்களுக்கும் வரும்.
• பாதுகாப்பற்ற உடலுறவு பால்வினை நோய்த்தொற்றுகளுக்கு வழிவகுத்து, அதனால் கூட ‘வெள்ளைப்படுதல்’ அதிகமாக இருப்பதற்கு வாய்ப்புண்டு.
• சில பெண்களுக்கு நோய் தோற்று காரணமாக இருக்கும். அதாவது மாதவிடாய்க்கு பயன்படுத்தும் நாப்கின் அலர்ச்சியினால் அல்லது வெளி இடங்களில் சுகாதாரமற்ற கழிவறைகளைப் பயன்படுத்தும் போது நோய் தொற்று ஏற்பட்டு வெள்ளைப்படுதல் அதிகப்படும்.

வெள்ளைப்படுதலில் இயல்பான முறை

• மாதவிடாய் நேரத்திற்கு முன்னரும் பின்னரும் ஆன இரண்டு நாட்கள் இருந்தால் அது இயல்பான ஒன்று தான். பொதுவாக ‘வெள்ளைப்படுதல்’ என்றால் அது வெள்ளை அல்லது வெளிர் நிறத்தில் திரவம் வெளியேறுவதாக இருக்கும்.
• மாதவிடாய்க்கு நேரம் அல்லது கர்ப்ப காலத்தில் ஹார்மோன் மாற்றத்தின் சமச்சீரற்ற தன்மையால் இயல்பாக இது ஏற்படலாம்.
• நம் உடல் ஹார்மோன்கள் இனப்பெருக்க உறுப்புகளை ஆரோக்கியமாகவும், ஈரமாகவும் வைத்திருக்கச் செய்யும் முயற்சியின் விளைவே இந்த ‘வெள்ளைப்படுதல்’.

எச்சரிக்கை அறிகுறிகள்

• மாதவிடாய் முன் பின் நேரம் தவிர ஒரு மாதத்தில் தொடர்ச்சியாக 5, 10 அல்லது 15 கூட நாட்களுக்கு மேலும் இந்த வெள்ளைப்படுதல் இருப்பது இயல்பானது அல்ல.
• பிறப்புறுப்புப் பகுதியில் அரிப்பு ஏற்பட்டு அந்த இடத்தில் சொரிந்து விடும் நிலை உண்டாகும்.
• வெளிப்படும் நேரம் எரிச்சல் ஏற்பட்டு, ஒருவித வாடையோடு வெள்ளை படுத்தல் வெளிவரும்.
• சாதாரண அளவை விட அதிகமாக வெளியேற்றம் இருக்கும்.
• ‘வெள்ளைப்படுதல்’ தயிர் மாதிரி கெட்டியாக வெளிவந்தாலோ அல்லது சளி மற்றும் க்ரீம் மாதிரி மற்றும் தண்ணீர் போல, பால் போல பிசுபிசுப்பாக…என்று இந்த மாதிரி எல்லாம் வெளியேறினால் கவனிக்க வேண்டும் என்று பொருள்.
• சீரியஸ் நிலை என்றால் வெளிப்படும் நிறம் லேசான பச்சை, மஞ்சள் அல்லது பழுப்பு நிறத்தில் கூட வெளி வரும்.

      இந்த நேரங்களில் உடம்பு சூடும் அதிகமாக இருக்கும். அப்போது நாம் பயன்படுத்தும் உள்ளாடையில் சிறு சிறு ஓட்டைகளும் உருவாகும். இந்த நிலையில் இருப்பது கொஞ்சமே கொஞ்சம் சீரியஸ் என்று உணர்ந்து உடல் சூட்டைக் குறைக்கும் வழியைக் காணவேண்டும்.

வெளி உடலில் உண்டாகும் மாற்றங்கள் 

• உடல் மெலியும்
• போதிய நீர்ச்சத்து இல்லாமல் உடல் வறச்சியாக தெரியும்
• உடல் சூடு அதிகம் வெளிப்படும். [ அருகில் யாராவது போனாலே லேசாக அனல் அடிப்பதை உணரலாம்.]
• பெண்ணுறுப்பில் அரிப்பு ஏற்படும்.
• உடல் சூட்டினால் கண் எரிச்சல் உண்டாகும்.
• எளிதில் உடல் சோர்வடைந்து விடும்,
• தலை முடி லேசாக கொட்டுவதை உணரலாம்.[ சிலர் முடி கொட்டுகிறது என்று புலம்பினால், இது கூட காரணமாக இருக்கலாம்.]
• மனம் அழுத்தமாக உணரத்துவங்குவோம்.

வெள்ளைப்படுதல் குறைக்கும் உணவு முறை

வெள்ளைப்படுதல் – தவிர்க்கும் உணவுகள் 

• அசைவம் உடல் சூட்டை அதிகரிக்கும் என்பதால் அடிக்கடி உண்பதை நிறுத்துங்க,
• வெள்ளை அதிகம் படுகிறது என்று உணர்ந்தால் பாலில் கலந்து குடிக்கும் [ விளம்பரத்தில் வரும் ] ஹெல்த் ட்ரிங்க் -குகளை குறைத்துக் கொள்ளுங்க,
• ஈஸ்ட் தொடர்பான உணவுப்பொருள்கள் [ அதாவது பிரெட்,பிஸ்கட் மாதிரி ] வெள்ளை படுதலை அதிகரிக்கும் என்பதால் உண்பதை குறித்துக்கொள்ளுங்க,
• அதிகம் முட்டை எடுத்துள்ள வேண்டாம். [ முட்டை வேண்டாம் என்று சொல்லவில்லை ]
• மாதவிடாய் நேரத்தில் இனிப்பு அதிகம் எடுத்தால் உதிரப்போக்கு அதிகம் ஆகிவிடும் என்பது தெரிந்தது தான். ஆனால் இனிப்பு அதிகம் உண்டால் வெள்ளைப்படுதல் கூட அதிகம் ஆகும். அதனால் இனிப்பு அதிகம் உண்பதைத் தவிருங்க,
• சுவையில் உப்பு, புளிப்பு, காரம் என்று அதிகம் உள்ள உணவுப்பொருள்கள் உண்பதை தவிருங்க, அதாவது புளிசாதம், புளிக்குழம்பு, காரம் சேர்த்த பாஸ்ட் கடை உணவுகள்.

வெள்ளைப்படுதல் – சேர்க்கும் உணவுகள் 

• பழவகைகள் – உடலுக்கு குளிர்ச்சியை அதிகரிக்கும் பழவகைகள் அதிகம் சாப்பிடுங்க. மாதுளம்பழம், பெரிய நெல்லிக்காய், எலுமிச்சை சாற்றை பானகம் செய்து பருகலாம். வெள்ளரிக்காய் அதிகம் உண்டால் நல்ல பலன் கிடைக்கும். தர்பூசணி பழங்கள், வாழைப்பழங்களும் சேர்த்துக்கொள்ளுங்க.
• காய்கறிகள் – வெள்ளை பூசணிக்காயும், வெண்டைக்காயும் அதிகம் வெள்ளைப்படுதலை தடுக்கும் காய்கறிகள். சுண்டவத்தலைக் காரம், புளிப்பு அதிகம் சேர்க்காமல் செய்து உணவாக உட்கொண்டால் அதுவும் நல்ல பலன் தரும். கற்றாழை சாறும் வெள்ளைப்படுத்தலுக்கு நல்லது. தேன் நெல்லியும் உதவும்.வெந்தயம் உடல் சூட்டை தடுப்பதால் நீரில் ஊறவைத்து தண்ணீருடன் சேர்த்து அருந்தலாம்.

தேங்காய் பூ

• பானம் – இளநீர், பதநீர், நுங்கு, மோர் அடிக்கடி குடிக்கலாம். பால் நிறைய குடித்தாலும் வெள்ளைப்படுதல் மட்டுப்படும். சப்ஜா விதை என்று சொல்லப்படும் துளசி விதையை குளிர்பானங்களில் சேர்த்து அதையும் அருந்தலாம். இது உடலுக்கு குளிர்ச்சியை தருகிறது. தண்ணீரில் நன்னாரி கொடி மற்றும் வெட்டிவேர் போட்டு அந்த நீரையும் அருந்தலாம். தேங்காய் பூ உடல் சூட்டுக்கு மிகவும் நல்லது. அது வெள்ளைப்படுதலை வெகுவாக குறைக்கிறது. ரோஜா இதழில் [ கடைகளில் கிடைக்கும் ] டீ போட்டு குடிக்கலாம். ஆவாரம்பூ டீயும் உடலுக்கு குளிர்ச்சி அளிக்கும். 
• இது எல்லாவற்றையும் விட தினமும் பழைய சாதத்தின் தண்ணீரை [ அதாங்க நீராகாரம் ] மோருடன் சேர்த்து குடித்துவத்தாலும் உடல் சூடு தணிந்து வெள்ளைப்படுதல் குறையும்.

     மேலே குறிப்பிட்ட எல்லாவற்றையும் ஒரே நேரத்தில் எடுத்துக் கொள்ள வேண்டும் என்ற அவசியம் இல்லை. சிறிது சிறிதாக ஒரு நாள் விட்டு ஒரு நாள் உடலுக்கு கொடுத்துக் கொண்டே இருந்தால், உடல் சூடு அடையாமல் மிதமான நிலையிலேயே இருக்கும். அதனால் வெள்ளைப்படுதலும் வெகுவாக குறையும்.

அதெல்லாம் சரி, அதிகமாக வெள்ளைபடுகிறது, உடனே குறைக்க வேண்டும், அதற்கு என்ன செய்வது? என்று யோசிப்பவர்கள் உள்ளதை சாப்பிட்டுப் பாருங்கள்… 

வெள்ளைப்படுதல் உடல் சூட்டினால் என்றால்..

• இரவு 1 இளநீரை எடுத்து, அதன் தலையை சீவி விட்டு அதன் உள்ளே பனங்கற்கண்டு போட்டு, மூடி வைங்க. மறுநாள் காலை நன்கு கலக்கி விட்டு, அந்த நீரை குடிங்க. இவ்வாறு 1 வாரம் வரை குடித்தால் நல்ல பலன் கிடைக்கும்.

• சிறுதானிய வகையான சிகப்பு சோளம், அல்லது கருப்பு கவுனி அரிசியில் சாதம் வடித்து [ ஆம் குக்கர் இல்லாமல் நேரடியாக வடித்து தான் ] அந்த சாதத்தில் நீர் ஊற்றி வைத்து, மறுநாள் அந்த நீராகாரத்தை தினமும் அருந்தி வர உடல் சூடு குறைந்து வெள்ளைப்படுவது மட்டுப்படும்.

வெள்ளைப்படுதல் நோய் தொற்றினால் என்றால்..

• இரண்டு டம்ளர் தண்ணீரில், காம்பு கிள்ளிய ஒரு வெற்றிலையை நன்கு கசக்கிப் போட்டு, அதில் 3 மிளகையும் தட்டிப் போட்டு, கொதிக்க வைங்க. 2 டம்ளர் 1 டம்ளராக சுண்டும் போது, எடுத்து அதில் பனங்கற்கண்டு போட்டு குடிங்க. இதனை 3 அல்லது 4 வாரங்கள் எடுத்துக்கொள்ளும் போது அதிகம் வெள்ளைப்படுதல் குறையும்.

            இவை எல்லாவற்றையும் விட மிக எளிதான தீர்வு என்றால் அது இரவு நேரத்தில் நன்றாக உறங்க வேண்டும். எந்த பிரச்சனை வந்தாலும் [ ஒரு பழமொழி சொல்வார்களே 'கிடக்கிறது கிடக்கட்டும் கிழவியைத் தூக்கி மனையில் வை' என்று அது போல ] சரியான தூக்கத்தை மட்டும் விடக்கூடாது. உறங்காமல் இருப்பதால் தான் 'வெள்ளைப்படுதல்' அதிகம் வருகிறது.

மிக முக்கியம்

வீட்டு வைத்தியத்தில் அதிகம் வெள்ளைப்படுதல் சரியாகாத சூழ்நிலை ஏற்பட்டால், அதாவது துர்நாற்றம் வருதல், வெள்ளைப்படுத்தலின் நிறம் மாறி வெளிவருதல், அரிப்பு மற்றும் எரிச்சல் ஆகியவை ஏற்படுத்தல், வெகு அதிகமான வெள்ளைப்படுதல் வெளிவருதல் அல்லது மாதத்தில் அதிகமான நாட்கள் வெள்ளை பட்டு கொண்டே இருத்தல் இந்த காரணங்கள் இருக்கின்றன, என்று உணர்ந்தால் கண்டிப்பாக காலதாமதம் செய்யாமல் மருத்துவரைப் பார்க்க வேண்டியது அவசியம். 

மேலும் விவரங்கள் கிடைத்தால் அவையும் பின்னர் இணைக்கப்படும்.

Tags,

vellaipaduthal, maathavidai prachnanai, athigam vellaipaduthal, வெள்ளைப்படுதல், மாதாவிடை பிரச்சனை, அதிகம் வெள்ளைப்படுதல், udal soodu kuraippathu eppai, vellaipaduvathai kuraippathu eppadi, உடல் சூடு குறைப்பது எப்படி, அதிகம் வெள்ளைப்படுவதை தடுப்பது எப்படி, வைட் டிஸ்சார்ஜ், white discharge,

.